Ս. Յովհաննէս Պօղոս Բ.-ի մասունքներու զետեղում` Հայ Կաթողիկէ Ս. Փրկիչ եկեղեցիին մէջ
Հովանաւորութեամբ Տանն Կիլիկիոյ կաթողիկէ հայոց Ներսէս Պետրոս ԺԹ. կաթողիկոս պատրիարքին,
երկօրեայ ձեռնարկներով տեղի ունեցաւ` Ս. Յովհաննէս Պօղոս Բ. պապի մասունքներու զետեղում
Պուրճ Համուտի հայ կաթողիկէ Ս. Փրկիչ եկեղեցւոյ մէջ: Շաբաթ, 15 նոյեմբեր 2014-ի կէսօրէ
ետք ժամը 4:00-ին, հակառակ տեղատարափ անձրեւին, հաւատացեալները Պուրճ Համուտի քաղաքապետարանի
հրապարակէն դիմաւորեցին Ս. Յովհաննէս Պօղոս Բ. պապին մասունքները, ապա թափօրով ուղղուեցան
դէպի Ս. Փրկիչ եկեղեցի: Յայտագիրը սկսաւ կարճ տեսերիզի մը ցուցադրութեամբ, որ կը պարունակէր
Ս. Յովհաննէս Պօղոս Բ. պապի կեանքէն պատկերներ, անոր յաջորդեց վարդարանի ջերմեռանդութիւնը:
Ապա` ժողովուրդին հրամցուեցաւ սուրբին կենսագրականը եւ անոր ցայտուն գործունէութիւնն
ու առաքինութիւնը: Յաջորդաբար իտալերէնէ հայերէն թարգմանուած ներկայացուեցաւ, թէ ինչպէ՛ս
կարտինալը ընտրուեցաւ կաթողիկէ եկեղեցւոյ 264-րդ քահանայապետ` կոչուելով Յովհաննէս Պօղոս
Բ.: Քարոզին ընդմէջէն, Ներսէս Պետրոս ԺԹ. կաթողիկոս պատրիարքը յիշեց Ս. Յովհաննէս
Պօղոս Բ.-ը իբրեւ հայասէր սուրբ պապ եւ առաջին պապը, որ այցելած է Հայաստան, յատկապէս
Ծիծեռնակաբերդ. ինչպէս նաեւ ան եղաւ առաջին պապը, որ ճանչցաւ Հայոց ցեղասպանութիւնը:
Ներսէս Պետրոս ԺԹ. կաթողիկոս պատրիարքը նաեւ մէջբերում կատարեց Ս. Յովհաննէս Պօղոս պապին
խօսքերէն` «Հայերը իբրեւ խաղաղութեան եւ աշխատասիրութեան պատգամաւորներ աշխարհը շրջեցան
եւ անցան: Հայերը իրենց ձեռքերու ծանր աշխատանքով թանկագին նպաստ մը ընծայեցին աշխարհին»:
Ան նաեւ արժեւորեց Վատիկանի մէջ` 19 յունուար 2005-ին, Ս. Գրիգոր Լուսաւորիչի յուշարձանի
զետեղումը` Ս. Յովհաննէս Պօղոսի Բ. պապին հրամանով: Կիրակի, 16 նոյեմբեր 2014-ի առաւօտեան
ժամը 10:00-ին, տեղի ունեցաւ ձայնաւոր սուրբ պատարագ, որ մատուցեց Զմմառու վանքի մեծաւոր
եւ Պէյրութի պատրիարքական թեմի ընդհանուր փոխանորդ Գաբրիէլ Թ.Ծ. վրդ. Մուրատեան: Ան անդրադարձաւ
Ս. Յովհաննէս Պօղոս Բ. պապին, որ կրցած է գրաւել երիտասարդութեան սիրտը, միտքն ու հոգին: Պատարագին
յաջորդեց թափօրը Պուրճ Համուտի մէջ. թափօրը առաջնորդուեցաւ ՀԿՄ-ի սկաուտներուն եւ շեփորախումբին
կողմէ: